२०७९ असार १२ आईतवार

चारवटा वडामा बालेन पछि परे

काठमाडौं । काठमाडौं महानगरपालिकाको मेयर पदमा स्वतन्त्र उम्मेदवार बालेन्द्र साहले अग्रता लिइरहेका छन् । उनको मत ३४ हजारभन्दा धेरै भइसकेको छ ।

सुरूवाती गणनामा सबै वडामा अग्रता लिइरहेका बालेन पछिल्लो गणनामा भने पछि परेका छन् । अहिलेसम्म वडा नम्बर १, २, ३, ४, ५, ६, ८, २८, २९, ३०, र ३२ को गणना सकिइसकेको छ ।

मतगणना सकिइसकेका वडामध्ये वडा नम्बर २८ मा बालेन दोस्रो भएका छन् । यहाँ बालेनले ७१७ मत ल्याए । पहिलो भएका एमालेका केशव स्थापितले ७४१ र कांग्रेसकी सृजना सिंहले ७१० मत ल्याए ।

गणना भइरहेका वडामध्ये वडा नम्बर २४, २५ र २७ मा बालेन पछि परेका छन् । वडा नम्बर २४ मा बालेन तेस्रो स्थानमा छन् । यहाँ एमालेको २९२, कांग्रेसको २४३ र बालेनको २१३ मत पुगेको छ ।

वडा नम्बर २५ मा बालेन दोस्रो छन् । यहाँ एमालेको ५२४, बालेनको ३५१ र कांग्रेसको ३२२ मत छ । यस्तै वडा नम्बर २७ मा बालेन तेस्रो छन् । यहाँ एमालेको ८३६, कांग्रेसको ७३८ र बालेनको ४६९ मत आएको छ ।

वडा नम्बर २८ पुरानो बसपार्क, वडा नम्बर २४ मखनटोल, वडा नम्बर २५ जनबहाल र वडा नम्बर २७ महाबौद्ध क्षेत्र हुन् । वडा नम्बर २४, २५ र २७ बालेन तुलनात्मक रुपमा कमजोर भएको भनिएका काठमाडौंको ‘कोर’ भनिने क्षेत्र हुन् ।

अहिलेसम्मम ९३ हजार ६४७ मत गणना हुँदा बालेन्द्रले ३४ हजार १३० मत पाएका छन् । एमालेका केशव स्थापित १८ हजार ५४७ र कांग्रेसकी सृजना सिंहले १८ हजार ४२९ मत पाएकी छिन् ।

बालेनले केशव स्थापितसँग १५ हजार ५८३ र सृजना सिंहसँग १५ हजार ७०१ मतको अग्रता लिइरहेका छन् । पछिल्लो समय स्थापितको तुलनामा सृजनाको मत बढेको छ । सृजना स्थापितभन्दा ११८ मत मात्र पछि छिन् ।

२०७९ जेष्ठ ७, शनिबार प्रकाशित 0 Minutes 849 Views

यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।

यो खबर पढेर तपाईलाई कस्तो महसुस भयो ?